T

taifaleo.nation.co.ke

@taifaleo Mon, 16 Nov 2026 06:55:38

Upinzani wapeleka injili ya 'Wantam' Kisii muda mfupi baada ya ziara ya Rais

VIONGOZI wa upinzani jana walifanya mikutano ya kisiasa katika Kaunti za Kisii na Nyamira, siku chache baada ya Rais William Ruto kukamilisha ziara ya siku nne katika eneo la Gusii, ambako alizindua miradi mbalimbali ya serikali. Ziara hiyo ya upinzani ilionekana kuwa juhudi za kukabiliana na kampeni za kisiasa za Kenya Kwanza, huku viongozi hao wakiwataka wakazi wakatae kumchagua Rais Ruto tena mwaka ujao. Walioshiriki katika mikutano hiyo ni kiongozi wa Jubilee Fred Matiang'i, Mbunge wa Kiharu Ndindi Nyoro wa People's Party of Kenya (PPK), kiongozi wa People's Liberation Party (PLP) Martha Karua na Gavana wa Siaya James Orengo. Viongozi hao walionya wakazi dhidi ya kushawishiwa na miradi ya maendeleo ambayo walisema Rais Ruto anaitumia kama chambo cha kutafuta muhula wa pili. Wakihutubia wananchi katika mzunguko wa Capital, Kisii kabla ya kuelekea Keumbu na Keroka, viongozi hao walisema upinzani utabaki na umoja ili kuhakikisha Rais anaondolewa mamlakani. "Walisema hatutakanyaga hapa. Hapa ni wapi? Kuna mtu anaweza kunizuia kurudi nyumbani? Rais aelewe kuwa sisi watu wa Gusii hatuuzwi na hakuna kiwango cha pesa kinachoweza kubadilisha msimamo wetu wa kumwondoa mamlakani," akasema Dkt Matiang'i. Alionya viongozi wa eneo hilo wanaomuunga Rais Ruto dhidi ya kuwasaliti wananchi kwa sababu ya pesa wanazopewa. "Wasijaribu kuwauza watu wetu kwa kutumia pesa zilizoibwa na hongo wakicheza na maisha ya watu wetu. Wakisii wameungana na Wakenya wengine walioazimia kumwondoa Ruto mamlakani," akasema. Dkt Matiang'i pia alikashifu madai ya vitisho vya vurugu dhidi ya viongozi wa upinzani, akisema Kenya ni demokrasia iliyokomaa ambamo kila mwananchi ana haki ya kutembelea eneo lolote. Bw Nyoro, kwa upande wake, alimshauri Rais Ruto kuheshimu viongozi wakuu akiwemo Rais Mstaafu Uhuru Kenyatta. "Rais anapaswa kuelewa kuwa yeye ndiye baba wa taifa na apime maneno yake. Mwai Kibaki alifanya kazi kwa nchi hii bila kuwakumbusha wananchi kila mara kuhusu miradi aliyotekeleza. Watu waliona kazi yake," akasema Bw Nyoro. Alimtaka Rais kukomesha matusi dhidi ya viongozi wengine, akisema tabia hiyo imefanya iwe vigumu kwa wazazi kutazama mikutano ya kisiasa pamoja na watoto wao. Bi Karua alisema Wakenya wamechoshwa na visa vya utekaji nyara, mauaji, njaa, ukosefu wa ajira na changamoto za elimu. "Serikali hii itatawala muhula mmoja pekee. Nawaomba watu wa Kisii kumuunga mkono Dkt Matiang'i na sisi wengine katika upinzani. Adui wetu ni mmoja, Ruto na washirika wake," akasema. Aliahidi kumuunga mkono mgombea atakayechaguliwa na upinzani kupeperusha bendera ya urais mwaka 2027. Gavana Orengo aliwataka Wakisii kumuunga mkono Dkt Matiang'i, akisema ni kiongozi wa kitaifa anayefaa kupewa nafasi ya kuongoza nchi. Alimshutumu Rais Ruto kwa kukiuka misingi ya Katiba na kuwataka wakazi kumkataa pamoja na washirika wake wa kisiasa.

read more
T

taifaleo.nation.co.ke

@taifaleo Mon, 16 Nov 2026 05:55:53

Muhoozi aendelea kukamata makamanda anaoshuku wanampinga asirithi babake Museveni

KAMPALA, Uganda: MVUTANO wa kisiasa na kijeshi nchini Uganda unaongezeka kufuatia hatua ya Mkuu wa Jeshi Jenerali Muhoozi Kainerugaba, kuendelea kukamata maafisa wakuu wa jeshi na kutoa vitisho dhidi ya Makamu wa Rais Jessica Alupo. Katika kipindi cha miezi 15 iliyopita majenerali na maafisa wakuu 12 wa kijeshi wamenaswa katika msako unaoongozwa na Kainerugaba, ambaye pia ni mwanawe Rais Museveni. Kainerugaba mwenye umri wa miaka 52 anaonekana na wengi kuwa mmoja wa watu wanaoweza kumrithi babake, ingawa azma yake inaripotiwa kukumbwa na upinzani ndani ya chama tawala National Resistance Movement (NRM). Katika kikao cha viongozi wakuu wa NRM mnamo Jumanne wiki iliyopita, hakukuwa na makubaliano kuhusu pendekezo la kumuunga mkono Kainerugaba amrithi Museveni. Baadhi ya viongozi waliripotiwa kupinga mpango huo huku wengine wakitilia shaka uwezo wake wa kuongoza serikali ya kiraia. Hata hivyo, Katibu Mkuu wa NRM Richard Todwong Awany alikanusha madai kwamba chama kimekataa kumuunga mkono Jenerali huyo, akisema maamuzi yoyote yatatangazwa rasmi kwa wakati unaofaa. Jumatatu usiku ya Novemba 9 Kainerugaba alimtaka Makamu wa Rais Jessica Alupo kujiandaa kuondoka ofisini, akisema ni yeye ndiye anapaswa kuchukua nafasi hiyo. "Yeyote aliye katika ofisi hiyo anapaswa kujiandaa kuikabidhi hivi karibuni," aliandika kwenye ukurasa wake wa mtandao wa X (zamani Twitter) kabla ya kufuta ujumbe huo. Aidha, alitishia kumfukuza kazi Alupo na kumkamata iwapo uchunguzi ungeonyesha kuhusika kwake katika kile alichokiita usaliti. Mchanganuzi wa masuala ya kisiasa Gerald Bareebe alisema kukamatwa kwa maafisa wanaotuhumiwa kupinga mipango ya Kainerugaba, ni katika jitihada zake za kuimarisha nafasi yake katika urithi wa urais. "Maafisa wakuu wanaoaminika kutounga mkono mpango huo wamekamatwa, kuzuiliwa au kushtakiwa kwa ufisadi na uhaini," alisema Bareebe. Hata hivyo, msemaji wa serikali Allan Kasujja alipuuzilia mbali madai ya mgawanyiko kuhusu urithi wa urais. Museveni, ambaye ana umri wa miaka 82, amekuwa mamlakani tangu mwaka 1986. Ameanza muhula wake wa saba baada ya kushinda uchaguzi wa urais mwaka huu. Mwanawe, Kainerugaba, tayari ametangaza nia ya kuwania urais mwaka 2031, hatua inayozidi kuchochea mjadala kuhusu nia ya familia hiyo kuendeleza utawala wao Uganda.

read more
T

taifaleo.nation.co.ke

@taifaleo Mon, 16 Nov 2026 04:55:57

Lamu sasa yazindua makaburi ya punda

KAUNTI ya Lamu, iliyo maarufu kwa kuwatunza punda kwa taadhima, imepiga hatua zaidi katika juhudi hizo kwa kuzindua eneo rasmi la kuzika wanyama hao punde wanapofariki. Sehemu hiyo ambayo imezungushiwa ua wa ukuta ilifunguliwa mwishoni mwa wiki katika eneo la Kandahar lililo viungani mwa mji wa kale wa Lamu kisiwani. Litatumiwa pia kuzika wanyama wengine wanaofugwa nyumbani wanapokufa. Hatua hiyo ilifanikishwa kupitia kwa mradi uliofadhiliwa na shirika la Donkey Sanctuary Kenya kwa ushirikiano na Serikali ya Kaunti ya Lamu kupitia Idara ya Mifugo na Manispaa ya eneo hilo. Katika Kaunti ya Lamu, punda ni nguzo kuu ya uchumi, usafiri na utamaduni wa wenyeji kwa kuwa vichochoro vya mji wa kale wa Lamu ni vyembamba na magari hayatumiki kisiwani. Kisiwa cha Lamu pekee kina zaidi ya punda 3,000. Mkurugenzi wa Donkey Sanctuary Kenya, Dkt Solomon Onyango alisema kuzinduliwa kwa eneo maalumu la kuzika punda na mifugo wengine kisiwani Lamu ni hatua muhimu katika kudhibiti afya ya umma, uhifadhi wa mazingira na heshima kwa wanyama. Afisa wa shirika hilo mjini Lamu, Bw Sam Kimeli, aliitaja hatua hiyo kuwa miongoni mwa mambo yanayodhihirisha wazi jinsi haki za wanyama zinavyozingatiwa. Mkurugenzi wa Idara ya Mifugo katika Serikali ya Kaunti ya Lamu, Dkt Felix Rachuonyo alifafanua kuwa mizoga ya wanyama inapoachwa wazi au kutupwa ovyo huleta harufu mbaya na kuvutia nzi na vimelea vinavyoweza kusambaza magonjwa kwa binadamu na mifugo wengine. "Kisiwa chenyewe cha Lamu kinategemea sana visima vya maji ya ardhini na mazingira safi ya bahari. Kuzika mizoga katika eneo lililotengwa kitaalamu kunazuia uchafuzi wa maji ya visima na fukwe za kihistoria," akasema Dkt Rachuonyo. Naye Afisa wa Udhibiti wa Mazingira wa Manispaa ya Lamu Gabriel Ngige alisema huduma za maziara hayo zitakuwa chini ya usimamizi wa manispaa ya Lamu. Alieleza kuwa, kila mzoga utatiwa kemikali maalumu zinazoyeyusha kwa haraka, ndani ya mashimo maalumu ambayo yamejengwa katika eneo hilo. Alitoa hakikisho kwa jamii zinazopakana na hapo kwamba ni shughuli ambayo haitatatiza mazingira kwani mashimo hayo huzibwa. Bw Ngige aliwataka wote wanaofiliwa na punda na wanyama wengine kupiga ripoti kwa ofisi ya manispaa ili kupokea maelekezo ya jinsi watawazika wanyama wao kwenye maziara hayo maalum. Aliweka wazi kwamba kuzika punda na wanyama wengine katika eneo hilo la makaburi ya wanyama hakutahitaji malipo au cheti chochote cha kibali cha mazishi. Ila alisisitiza haja ya wananchi kufika wenyewe katika ofisi ya manispaa ili kuwasilisha taarifa za mnyama husika kabla ya mazishi. "Hatua hiyo itatuwezesha kuingiza kumbukumbu hizo kwenye mfumo wetu wa data na hivyo kuepusha uwezekano wa kesi au mivutano ya kisheria mahakamani endapo mnyama atazikwa maziarani bila ofisi ya manispaa kuwa na taarifa," akasema Bw Ngige.

read more