T

taifaleo.nation.co.ke

@taifaleo Mon, 16 Nov 2026 02:55:07

Kosovo, mtaa mdogo wenye makanisa 50! 'Ikifika Jumapili, kelele hazivumiliki'

KATIKA eneo la Makanisani, maarufu kama Kosovo, lililoko Uthiru mpakani mwa Nairobi na Kiambu, kuna hali ya kipekee ambapo zaidi ya makanisa 50, makazi na biashara ndogo ndogo zimesongamana kwenye kipande kidogo cha ardhi katikati ya Barabara Kuu ya Waiyaki Way. Eneo hilo lenye ukubwa wa ekari 1.75 lina nyumba 135, nyingi zikiwa zimejengwa kwa mabati. Kosovo inafanana na mtaa wa mabanda. Baadhi ya wakazi wameishi hapo kwa miongo kadhaa, huku familia nyingine zikiwa na vizazi vitatu vinavyoishi katika eneo hilo. Hata hivyo, makanisa ndiyo yanayotawala mandhari ya Kosovo, huku mengine yakiwa yamejengwa kwa kubanana kiasi kwamba nafasi kati ya majengo mawili ni chini ya sentimita moja. Bw Josh Adom, ambaye amekuwa akiishi eneo hilo tangu 1986, anakumbuka wakati ambapo kulikuwa na makanisa machache na sehemu kubwa ya ardhi ilikuwa na miti na mimea. "Nilipofika hapa, makanisa yalikuwa machache na sehemu iliyobaki ilikuwa kama shamba au msitu," akasema. Kwa mujibu wa Bw Adom, Kanisa la Hebron Church of Africa, linalohusishwa na waumini wa Akorino, ndilo lilikuwa la kwanza kuanzishwa eneo hilo. Anaongeza kuwa serikali ilijenga vibanda sawia na vilivyo katika soko la Uthiru, vikitenganishwa na seng'enge, lakini wafanyabiashara walipokosa kuvitumia, baadhi ya watu walifunika mianya katika seng'enge hizo na kuanza kuishi humo. Baadaye, makanisa yakaanza kuchipuka. Mzee Anthony Wafula, muumini wa Kanisa la Bethel Holy Spirit, anasema makazi hayo yalianza wakati wa utawala wa rais wa pili Daniel arap Moi, baada ya watu kuondolewa katika soko jirani. Anakiri kuwa wakazi wanafahamu ardhi hiyo ni ya serikali na wanaweza kuondolewa wakati wowote. "Kila mtu anajua hii ni ardhi ya serikali na tunaweza kufurushwa wakati wowote," akasema. Kusongamana kwa makanisa hapo kumesababisha changamoto ya kelele, hasa Jumapili wakati wa ibada. Bw Adom anasema baadhi ya makanisa yanashindana kwa kutumia mifumo mikubwa ya sauti ili kuzidi mengine. "Kuna makanisa mengi hapa yanayopiga kelele, hasa Jumapili. Yale yaliyo na vifaa vikubwa vya sauti yanataka kushinda mengine na kelele zinazotokea hapa hazivumiliki," akaongeza. Hata hivyo, mchungaji Geoffrey Lugaka wa Kanisa la Restoration and Revival anasema makanisa yamekubaliana kuheshimiana na kupunguza sauti ili kuwe na amani nao wafanyakazi wasiathirike. "Unafaa kuishi kwa amani na jirani yako ambaye hana vifaa vya kuongeza sauti. Kwa hiyo, hupaswi kuomba kwa sauti ya juu sana," akasema. Mbali na kelele, wakazi wanakabiliwa na uhaba wa vyoo, maji na huduma za usafi. Baadhi ya wakazi hulipa Sh10 kutumia mabafu ya pamoja, huku wengine wakilazimika kubeba maji yao wanapotumia vyoo. Usalama pia umekuwa changamoto katika njia nyembamba kati ya majengo. Hata hivyo, taa kubwa iliyowekwa kwa ushirikiano na serikali za kaunti za Nairobi na Kiambu imesaidia kupunguza uhalifu. Mchungaji Lugaka anakumbuka wakati eneo hilo lilijulikana kama "Kichinjio cha Watu" kutokana na mauaji yaliyokuwa yakitokea. "Hali ilianza kuwa salama majengo yalipoanza kujengwa," akasema. Hata hivyo, sasa wakazi wanakabiliwa na tishio jipya kutokana na upanuzi wa barabara ya Waiyaki Way. Baadhi ya makanisa na nyumba zimewekewa alama za kubomolewa ili kupisha upanuzi huo, huku walioathiriwa wakipewa hadi Desemba kuhama au kupunguza ukubwa wa majengo yao. Mchungaji Lugaka anasema awali waliambiwa kuondoa majengo yaliyokuwa ndani ya mita tano kutoka barabarani, lakini baadaye umbali huo ukaongezwa hadi mita 10. Mzee Wafula anasema wakazi hawapingi kuondoka iwapo serikali itahitaji ardhi hiyo. "Wakitutaka tuondoke, wanapaswa kutupa muda wa kufanya hivyo. Huwezi kukataa kuondoka kwenye ardhi ya serikali," akasema. Hata hivyo, mkazi Evelyne Mwende anasema jamii inahitaji kupewa eneo mbadala la kuishi. "Hatutakataa kuondoka, lakini serikali inapaswa kutupatia sehemu nyingine ya kuishi," akasema. Kwa sasa, wakazi na viongozi wa makanisa wanasubiri kujua ni majengo yapi yatabomolewa na hatima ya familia na waumini watakaopoteza makazi na sehemu zao za ibada.

read more
T

taifaleo.nation.co.ke

@taifaleo Sun, 15 Nov 2026 17:55:19

Ruku aambia Karauri hiyo tiketi ya ugavana aliyoifuata UDA pia yeye anaitaka

WAZIRI wa Utumishi wa Umma Geoffrey Ruku na Mbunge wa Kasarani Ronald Karauri wanajiandaa kukabiliana katika mchujo wa UDA kuwania ugavana wa Nairobi 2027, hali ambayo ni mtihani kwa Rais William Ruto kudhibiti ushindani wa kisiasa ndani ya chama chake. Wawili hao wanataka kumrithi Gavana Johnson Sakaja, aliyehama UDA na kujiunga na ODM. Bw Ruku anajitambulisha kama msimamizi mwenye uzoefu, huku Bw Karauri akijenga kampeni yake kwa kudai kazi yake Kasarani inaonekana. Bw Karauri alipokelewa rasmi UDA Novemba 9 na viongozi wakuu wa chama, akiwemo Kiongozi wa Wengi katika Bunge la Kitaifa Kimani Ichung'wah na Katibu Mkuu Hassan Omar. Bw Ichung'wah alifichua kuwa Rais Ruto alikuwa amempigia simu na kumwelekeza ampokee mbunge huyo. Bw Ichung'wah pia alimtaja Karauri kuwa mgombea wa chama atakayekabiliana na ODM Nairobi, hatua iliyozua hisia kuwa huenda anapendelewa dhidi ya wagombea wengine. Hata hivyo, Bw Ruku amesema anajitambulisha na UDA licha ya kuwa alichaguliwa bungeni kupitia DP kabla ya kujiuzulu na kuwa waziri. "Rais amebadilisha nchi hii na ninakubaliana kikamilifu na misingi ya UDA. Ndiyo maana ninawania kiti hicho kupitia tiketi ya UDA," akasema. Alipoulizwa iwapo amezungumza na Rais kuhusu kuondoka serikalini na kuwania ugavana, alijibu: "Tumwache Rais nje ya mazungumzo haya." Bw Ruku amekuwa akifanya mikutano na wakazi wa Nairobi, akisema amekuwa akiishi jijini humu tangu akiwa na umri wa miaka 18 na watoto wake watano wamezaliwa na kusomea jijini. Amesema anaelewa changamoto zinazowakabili wakazi wa maeneo tofauti, kuanzia Kawangware hadi Donholm. Pia amepinga rekodi ya Bw Karauri Kasarani, akidai mbunge huyo anafaa kueleza alichowafanyia wapiga kura wake kabla ya kutafuta wadhifa mkubwa zaidi. "Ukienda Kasarani na kuwauliza wakazi kama watamchagua tena kuwa mbunge, watakuambia hapana," akasema Bw Ruku. Waziri huyo anasema uzoefu wake kama mbunge wa Mbeere Kaskazini na waziri unamwandaa kuongoza Nairobi. "Ninasimamia wizara inayohudumia Jamhuri nzima ya Kenya," akasema. Kwa upande wake, Bw Karauri amesema atakubali matokeo ya mchujo ikiwa yatafanyika kwa uwazi. Hata hivyo, ameonya kuwa anaweza kuwania kama mgombea huru akihisi amenyimwa haki. "Natumai mchujo utakuwa wa uwazi lakini nikichezewa kama nilivyochezewa Jubilee, nitawania kama mgombea huru," akasema. Tofauti na Bw Karauri, Waziri Ruku amesema atamuunga mkono yeyote atakayeshinda mchujo wa UDA. Kinyang'anyiro hicho pia kinamshirikisha Patrick Musili Mbangula, ambaye amesema hatajiondoa kwa sababu ya kujiunga kwa Bw Karauri. Bw Ruku amemkosoa Gavana Sakaja kuhusu ukusanyaji taka na uhaba wa maji, akisema kubadilisha chama hakufuti wajibu wake kwa wakazi. "Uchafu katika kila mtaa wa Nairobi haukubaliki kabisa," akasema. Bw Sakaja alichaguliwa 2022 kwa kura 699,000 na sasa anatafuta muhula wa pili kupitia ODM japo Nairobi nzima kwa sasa ina wapiga kura milioni 2.7.

read more
T

taifaleo.nation.co.ke

@taifaleo Sun, 15 Nov 2026 16:55:59

Papa Leo XIV aunda jimbo kuu jipya la Eldoret, ateua Obanyi kuwa askofu mkuu

KIONGOZI wa kanisa Katoliki ulimwenguni, Papa Leo XIV, ameunda Jimbo Kuu la Kanisa Katoliki la Eldoret na kumteua Askofu Joseph Obanyi Sagwe wa Kakamega kuwa askofu mkuu wa kwanza wa dayosisi hiyo mpya. Tangazo hilo lilitolewa Ijumaa saa nane mchana saa za Kenya kupitia taarifa rasmi iliyotumwa kwa maaskofu nchini na ofisi ya Mwakilishi wa Papa nchini Kenya. Jimbo Kuu la Eldoret litakuwa na dayosisi nne: Lodwar, Kapsabet, Kitale na Kericho. Hatua hiyo ni mabadiliko makubwa katika muundo wa kanisa Katoliki nchini, hasa maeneo ya Magharibi na Kaskazini-Magharibi ambako kanisa limekuwa likipanua shughuli zake na huduma kwa waumini. Askofu Obanyi amekuwa akiongoza dayosisi ya Eldoret kwa muda kama msimamizi baada ya Askofu Mkuu Dominic Kimengich kuhamishiwa Mombasa kuwa askofu mkuu msaidizi. Katika wadhifa wake mpya Obanyi ataongoza Jimbo Kuu la Eldoret na kuimarisha ushirikiano kati ya dayosisi nne zilizo chini yake. Dayosisi za Lodwar, Kapsabet na Kitale awali zilikuwa chini ya Jimbo Kuu la Kisumu, huku Kericho ikiwa chini ya Jimbo Kuu la Nairobi. Kuanzishwa kwa Jimbo Kuu la Eldoret kunalenga kurahisisha uratibu wa shughuli za kanisa na kuimarisha huduma kwa waumini katika eneo hilo. Obanyi alizaliwa mwaka 1967 katika eneo la Kebiro, Dayosisi ya Kisii. Alisomea falsafa katika Seminari Kuu ya St Augustine, Mabanga, kabla kuendelea na masomo ya theolojia katika Seminari Kuu ya St Thomas Aquinas jijini Nairobi. Alitawazwa kuwa kasisi wa Dayosisi ya Kisii Oktoba 25, 1996. Baadaye alisomea katika Chuo Kikuu cha Lateran, Roma, kati ya 1999 na 2004. Mnamo Desemba 5, 2014, Papa Francis alimteua kuwa Askofu wa Kakamega, akichukua nafasi ya marehemu Askofu Philip Sulumeti. Alitawazwa Machi 7, 2015 katika Uwanja wa Bukhungu, Kakamega. Dayosisi za Lodwar, Kapsabet na Kitale hapo awali zilikuwa chini ya Jimbo Kuu la Kisumu, huku Kericho ikiwa chini ya Jimbo Kuu la Nairobi. Kuanzishwa kwa Jimbo Kuu la Eldoret kunalenga kurahisisha uratibu wa shughuli za kanisa na kuimarisha huduma kwa waumini katika eneo hilo.

read more