T

taifaleo.nation.co.ke

@taifaleo Fri, 20 Nov 2026 06:55:29

Wasiwasi idadi ya viboko waliokufa Ziwa Naivasha ikipanda

WAVUVI katika Ziwa Naivasha wameingiwa na hofu baada ya viboko wengine watatu kupatikana wamekufa majini, na kufikisha tisa idadi ya wanyama hao waliofariki katika kipindi cha wiki tatu. Mwanachama wa Kamere Beach Management Unit (BMU), Bw Labaan Ewoi, alisema viboko wawili walipatikana katika maeneo ya Malewa na Crayfish Jumatano, huku mwingine akionekana katika eneo la Fishermen Alhamisi asubuhi. Alisema wavuvi wenzake walimuarifu baada ya kuona mizoga hiyo ikielea majini walipokuwa wakielekea kazini. Bw Ewoi, ambaye amekuwa mvuvi kwa miaka tisa, alisema wakazi wana wasiwasi kwa kuwa Shirika la Kulinda Wanyama Pori Kenya (KWS) lilikuwa limeahidi kufanya uchunguzi wa kina ili kubaini chanzo cha vifo hivyo, lakini visa vinaendelea kuripotiwa. "Maafisa wa KWS walipokuja walisema watafanya uchunguzi kwa sababu vifo hivyo vimekuwa vingi na walihitaji kubaini chanzo chake. Tunahofia hali hii kwa sababu si kawaida kusikia visa kama hivi Naivasha. Viboko hulisha katika maeneo ya kandokando ya ziwa," alisema. Bw Ewoi alisema Novemba 12, 2026, aliona viboko wawili wakielea majini katika eneo la Kibokoni na akatuma picha kwa KWS. Baadaye, wavuvi wengine waliripoti mizoga miwili katika eneo la Malewa, ambayo ilikuwa imevimba. Baadhi ya mizoga haikuwa na majeraha yanayoonekana, huku mmoja ukiwa tayari umeanza kuoza. KWS imethibitisha kupata mizoga mitano, huku kifo kingine kikiwa bado hakijathibitishwa. Mkurugenzi Msaidizi Mkuu wa Mawasiliano wa shirika hilo, Bw Duncan Juma, alisema maafisa wa wanyamapori walijaribu kufika karibu na mzoga ulioripotiwa eneo la Crayfish Jumatano, lakini hawakuweza kuufikia. Alisema daktari wa mifugo aliyekagua kiboko mmoja aliyepatikana Kibokoni alihusisha kifo chake na uzee. Viboko wawili wa kwanza walipatikana Kamere Oktoba 27, wakiwa wamelala kando ya ziwa umbali mfupi kutoka kwa kila mmoja. Video iliyosambaa mitandaoni ilionyesha wakihangaika kuinuka kabla ya kuanguka tena. Katika taarifa ya Novemba 19, KWS ilisema uchunguzi wa mizoga hiyo miwili ulibaini kuwa viboko hao walikufa baada ya kula nyavu za uvuvi na mabua mengi ya mahindi. Uchunguzi wa kiboko mmoja wa kike ulionyesha kuwa kipande kikubwa cha wavu wa plastiki kilikuwa kimeziba kabisa sehemu ya mfumo wa kusaga chakula, na kusababisha matatizo yaliyofanya moyo na mapafu kushindwa kufanya kazi. Kwa kiboko mwingine, mabua ya mahindi yalichangia chakula kuchacha tumboni na kusababisha gesi nyingi, hali iliyobana mapafu na kuathiri upumuaji. KWS imewataka wavuvi, jamii na viongozi wa BMU kuhakikisha nyavu na vifaa vya uvuvi vinatunzwa na kutupwa ipasavyo ili visiwe hatari kwa wanyamapori. Pia imeonya dhidi ya kuwaacha wanyama hao kula vyakula visivyowafaa.

read more
T

taifaleo.nation.co.ke

@taifaleo Fri, 20 Nov 2026 05:55:26

Ruto apeleka injili ya 'Usawa' magharibi akiahidi miradi ya mabilioni ya pesa

RAIS William Ruto ameahidi kutumia Sh15 bilioni kujenga kilomita 150 za barabara katika Kaunti ya Busia, huku akizindua miradi ya miundombinu na kutangaza mipango ya kuimarisha usalama na usambazaji wa umeme katika eneo hilo. Dkt Ruto, aliyeanza ziara ya siku nne katika eneo la Magharibi mwa Kenya Alhamisi, pia aliahidi kuunganisha familia 16,000 na umeme katika Busia ndani ya miezi sita ijayo. Katika ziara hiyo, aliweka jiwe la msingi la ujenzi wa kambi ya Kikosi cha kukabiliana na fujo (GSU) eneo la Akichelesit, Teso Kaskazini, na kutangaza kuwa serikali itatenga Sh100 milioni kujenga nyumba za maafisa watakaohudumu hapo. Alisema mradi huo utaimarisha usalama katika eneo hilo na kuhakikisha maafisa wa polisi wanapata mazingira bora ya kuishi wanapotekeleza wajibu wao wa kulinda wananchi na mali yao. Rais pia alifungua Kituo cha Utamaduni cha Kakapel Iteso, kinacholenga kuhifadhi na kukuza urithi wa jamii ya Iteso. Katika Kaunti ya Bungoma, alizindua Barabara ya Matisi-Bokoli-Milani-Teremi, akaweka jiwe la msingi la soko la Bokoli na kufungua Barabara ya Mfupi-Mukuyuni-Naitiri pamoja na soko la Naitiri. Baada ya kutangaza miradi hiyo, Dkt Ruto alitumia ziara hiyo kuwataka wapinzani wake kukubali kupimwa na wapigakura kwa rekodi zao za maendeleo badala ya kutumia idadi ya watu wa jamii zao kujipatia nafasi za kisiasa. Akiwahutubia wakazi wa Teso Kaskazini, alisema uchaguzi unapaswa kuwa kipimo cha kile viongozi wamefanyia wananchi, wala si mashindano ya kikabila au kauli mbiu za kisiasa. Alisema kila eneo nchini lina haki sawa ya kupata maendeleo na kwamba serikali yake haitaacha nyuma jamii yoyote katika mipango yake ya kubadilisha maisha ya wananchi. Alikosoa wanasiasa ambao, kulingana naye, hutumia idadi ya watu na nguvu za kura za jamii zao kudai mgao wa mamlaka. "Je, Mnataka kuambiwa kwamba unatoka katika jamii ndogo au kwamba ninyi ni wachache? Kila kiongozi anapaswa kupimwa na wapigakura na kuhukumiwa kwa rekodi yake ya kazi," alisema. Rais aliwauliza wapinzani wake ajenda yao ni ipi zaidi ya kauli za kutaka serikali iondoke madarakani, akisema yake inalenga miundombinu, kilimo, elimu na huduma za afya. Kauli hizo zinaonekana kulenga pia msimamo wa aliyekuwa Naibu Rais Rigathi Gachagua, anayeongoza chama cha Democracy for the Citizens (DCP), ambaye amekuwa akisisitiza umuhimu wa idadi ya kura za jamii mbalimbali katika mazungumzo ya kuunda serikali. Dkt Ruto alipuuza madai kwamba jamii zinaweza kutumia idadi ya kura wanazodai kuwa nazo kama silaha ya kujadiliana kuhusu mamlaka. "Hakuna mtu anayebeba mamilioni ya kura anayodai kuwa nayo na kwenda nayo hotelini kujadiliana kuhusu mamlaka. Nitawaonyesha vumbi," alisema. Aliwataka wakazi wa Busia kutathmini rekodi yake ya maendeleo na kumpa muhula wa pili ili aendeleze miradi inayoendelea. Pia alitetea serikali jumuishi, akisema ndiyo njia ya kuimarisha umoja wa kitaifa na kuhakikisha kila eneo linanufaika na maendeleo. Alisema serikali haitakubali siasa za ukabila na chuki, akiwataka wananchi kuungana chini ya falsafa ya "Usawa ni Sawa".

read more