T

taifaleo.nation.co.ke

@taifaleo Tue, 17 Nov 2026 06:55:17

Msimamizi wa KCSE Kwale alidanganya kuhusu kushambuliwa, Wizara yadai

WAZIRI wa Elimu, Bw Julius Ogamba, amepinga madai ya msimamizi wa mtihani wa kitaifa wa shule za upili (KCSE) kutoka Kaunti ya Kwale, aliyeripoti kuwa alishambuliwa baada ya kukataa kushiriki katika njama ya kuruhusu udanganyifu katika m tihani huo unaoendelea. Bw Ogamba alisema msimamizi huyo, Bw Julius Ndurya, aliyeshambuliwa na watu wasiojulikana mwendo wa saa nne usiku, alikuwa akirejea kutoka kwenye matembezi ya starehe, na kwamba tukio hilo halikuwa na uhusiano wowote na mitihani ya kitaifa inayoendelea. "Mmoja wa maafisa wetu alienda eneo hilo kuchunguza suala hilo na nimeelezwa kuwa mwalimu huyo alikuwa akijivinjari saa nne usiku. Hapo ndipo aliposhambuliwa. Lakini tukio hilo halina uhusiano wowote na mitihani ya KCSE," alisema Bw Ogamba. "Tunachunguza ili kubaini kwa nini alidai kushambuliwa kwa sababu ya mitihani ilhali hakuwa hata karibu na kituo cha mitihani au shule," alisema katika ofisi ya Naibu Kamishna wa Kaunti-ndogo ya Nyali, Jumatatu asubuhi. Bw Ndurya, ambaye alikuwa msimamizi wa mitihani katika Shule ya Upili ya Vigurungani, eneo la Kinango, alipata majeraha ya kukatwa kichwani na kuvunjika mkono katika shambulizi la Jumatano jioni wiki iliyopita. Akizungumza akiwa nyumbani kwake, alisema alishambuliwa baada ya kukataa kushiriki katika udanganyifu wa mitihani uliohusisha baadhi ya walimu na maafisa wa elimu wa eneo hilo. Alidai kuwa alipewa Sh50,000 ili afiche ukiukaji wa taratibu za mitihani lakini akakataa. Kulingana naye, alitekwa nyara alipokuwa akiondoka katika afisi ya idara ya elimu Kinango, akapelekwa hadi Vigurungani ambako alipigwa. "Walikuwa wakipiga kelele wakisema kwamba siku iliyofuata nisingerudi shuleni. Walisema wangeniua kwa sababu ninatoka katika jamii yao na mimi ni mmoja wao, lakini sikuwa tayari kuwasaidia," alisema. Katika ripoti ya Novemba 15, Mkurugenzi wa Elimu wa Kaunti ya Kwale, Bw Ahmed Abdi, alisema ofisi yake iliarifiwa kuhusu tukio hilo na Afisa wa Usalama wa Kaunti-ndogo ya Kinango na mara moja ikawasiliana na ofisi ya Tume ya Huduma kwa Walimu (TSC) ya eneo hilo ili kumteua msimamizi mwingine kuchukua nafasi yake, kuhakikisha mitihani inaendelea bila kukatizwa. Kuhusu tuhuma za ukiukaji wa taratibu za mitihani, alisema: "Madai yaliyotolewa na Bw Ndurya kuhusu kasoro katika uendeshaji wa mitihani katika kituo hicho hayajathibitishwa na yanakanushwa. Kituo hicho hakijakumbwa na kasoro au ukiukaji wowote wa taratibu katika mitihani ya KCSE inayoendelea." Aliongeza kuwa uchunguzi ulikuwa bado haujabaini iwapo washambuliaji walikuwa majambazi au watu wanaomfahamu Bw Ndurya, au iwapo shambulizi hilo lilihusiana na shughuli za mitihani, wanafunzi au walimu. Bw Abdi alisema mitihani iliendelea kama kawaida. Mkutano wa pamoja wa taasisi mbalimbali ulipangwa kufanyika Jumatatu ili kubaini hatua zitakazofuata. Ofisi hiyo ilisema itatoa ripoti ya kina baada ya Idara ya Upelelezi wa Jinai (DCI) kukamilisha uchunguzi wake. Wakati huo huo, Bw Ogamba alithibitisha kuwa uchunguzi kuhusu tukio la Kisii unaendelea, akisema baadhi ya watu tayari wamerekodi taarifa zao.

read more
T

taifaleo.nation.co.ke

@taifaleo Tue, 17 Nov 2026 05:55:13

Kinachomsubiri Pochettino ugani Old Trafford

MAURICIO Pochettino anatua ugani Old Trafford akiwa na sifa ya kuwa kocha asiyependa masihara, anayekumbatia maandalizi kabambe kabla ya kila msimu na anayetaka wachezaji wote kuwa katika hali thabiti kiakili na kimwili kila wakati. Manchester United wameajiri mkufunzi huyo raia wa Argentina hadi Juni 2029 kuchukua nafasi ya Michael Carrick aliyetimuliwa baada ya kikosi kusajili msururu wa matokeo duni muhula huu. Kwa mujibu wa difenda wa zamani wa Tottenham Toby Alderweireld, Pochettino ni kocha shupavu aliye na msimamo imara katika masuala ya usimamizi na mwenye uwezo wa kupata kilicho bora kutoka kwa kikosi chake iwapo kila mmoja atajituma katika majukumu yake. Alderweireld, 37, alinolewa na Pochettino kwa miaka minne huko Tottenham Hotspur na alishuhudia kikosi hicho kikifanikiwa kutinga fainali ya Klabu Bingwa Ulaya (UEFA) kumaliza kampeni za Ligi Kuu ya Uingereza (EPL) katika nafasi ya pili. "Ni mkufunzi anayefikika kwa urahisi lakini sharti ufuate masharti yake. Usipozingatia mipangilio yake na kukumbatia mbinu zake za ukufunzi, ni rahisi sana akuondoe mawazoni na utakosa nafasi ya kuchezea kikosi chake." "Anapenda sana wachezaji wanaohubiri lugha ya umoja na ushirikiano. Atamtema yeyote ambaye ni mbinafsi au anayejipenda na kujifikiria tu kwa kuweka mbele maslahi yake binafsi," akasema Alderweireld. "Ingawa anaheshimu kwamba mchezaji ana maisha yake nje ya uwanja wa soka, anapenda sana kufuatilia mambo madogo. Ni mtu aliye na mawazo yake mwenyewe na haijalishi iwapo utakubaliana naye au la. Nadhani Man-United wanahitaji sana kocha wa sampuli hiyo ndipo wapate mwelekeo ulio sawa," akasisitiza. "Ni mtu mwerevu anayejua kuzungumza na wanahabari na kuteua maneno yake. Anafahamu cha kusema na jinsi ya kukisema. Ni mwepesi wa kusoma mazingira na anapenda kujua uwezo na udhaifu wa kila mmoja. Ni kocha wa kuhimiza ushirikiano na si mwepesi wa kuyumbishwa hata watu wakisema nini. Anajua kila kitu kikosini na kama hayupo, ataangalia video na kuongozwa na takwimu za kila mmoja mazoezini. Mwishowe atafahamu kila kitu kuhusu wachezaji wake ndani na nje ya uwanja." "Yeye huangalia sana uchanya wa kila jambo na hupenda kusema kwamba mwili ndio silaha kubwa kwa mchezaji. Iwapo mwanasoka hataulinda ipasavyo, basi itamwia vigumu kufanya kazi. Anafuatilia sana vipindi vyote vya mazoezi ya wachezaji wake," akaongeza. Man-United wamekosolewa pakubwa msimu huu kwa sababu ya wachezaji wake kukosa uthabiti wa mwili na kutomakinika zaidi uwanjani. Hata baadhi ya wanasoka wa miamba hao wa zamani wamekuwa wakishindwa kabisa kukimbia ugani wakati wa mechi. Pamoja na changamoto hizo, mbinu duni za ukufunzi zimechangia kikosi hicho kushikilia nafasi ya 18 jedwalini kwa alama nane kutokana na mechi 10 za hadi kufikia sasa katika EPL. Alderweireld anasema kikubwa zaidi anachohitaji Pochettino kutoka kwa wachezaji wake ni utimamu akili na uthabiti wa mwili ndipo wakimbie uwanjani. "Kwanza alitufanya sote tuwe fiti kila wakati kwa asilimia 100. Mechi zake za kujiandaa kwa msimu mpya hazikuwa na mchezo! Anataka kila mchezaji awe na uwezo wa kukimbia kwa kasi ya juu na matarajio yake kutoka kwa kila mmoja ni ya kiwango cha juu," akasema Alderweireld. Hofu zaidi kwa Pochettino ni kwamba anarithi kikosi ambacho kimeshinda mechi moja tu kati ya 11 zilizopita katika mashindano yote licha ya kumwaga sokoni mabilioni ya pesa mwanzoni mwa msimu huu kwa ajili ya kusajili wanasoka Youri Tielemans, Andrey Santos na Carlos Baleba. Pamoja na kuwa na safu legevu ya ulinzi, Man-United wanakosa makali katika idara ya mbele ambayo kwa sasa inaongozwa na Bryan Mbeumo kwa ushirikiano na Matheus Cunha, Bruno Fernandes, Marcus Rashford na Amad Diallo. Ingawa hivyo, Pochettino anajivunia uzoefu wa miaka mingi katika ulingo wa ukufunzi; akihudumu kwa msimu mmoja na nusu huko Paris Saint-Germain (PSG), msimu mmoja huko Chelsea na akiongoza Amerika katika Kombe la Dunia hivi majuzi. Hata hivyo, aliajiriwa na Man-United kwa sababu ya mafanikio yake kambini mwa Spurs. Alipokezwa mikoba ya klabu hiyo katika kipindi cha mpito na akatambisha kikosi cha wanasoka wachanga kwa kuboresha matokeo yao katika EPL kutoka kwa wastani wa pointi 68.4 kwa msimu katika kipindi cha miaka mitatu ya kwanza kuanzia 2014 hadi wastani wa alama 73.6 alipobanduka 2019.

read more