T

taifaleo.nation.co.ke

@taifaleo Thu, 12 Nov 2026 07:55:52

Ida Odinga asema anamuunga mkono Ruto, asema mumewe alimwacha serikali ya BroadBased

MJANE wa aliyekuwa waziri mkuu marehemu Raila Odinga, Ida Odinga, ameweka wazi msimamo wake wa kisiasa baada ya wiki kadhaa za minong'ono kuhusu mwelekeo wa familia yake kutokana na kifo cha mumewe. Ida amesema bado yuko katika chama cha ODM na anaunga mkono Serikali Jumuishi inayoongozwa na Rais William Ruto, akisisitiza kuwa huo ndio msimamo ambao Raila alimwachia kabla ya kufariki. Akizungumza Jumanne, Novemba 10, katika uzinduzi wa mpango wa usimamizi wa eneo la Gembe Hills, eneobunge la Suba Kaskazini, Ida alisema hana nia ya kuachana na misingi ya kisiasa ya mumewe. "Aliponiacha, hapo ndipo nilipo. Aliniacha katika ODM na Serikali Jumuishi na bado nimesimama hapo," alisema. Aliongeza kuwa Raila alimweleza kuwa Dkt Ruto ndiye kiongozi wa nchi na kwamba huo ndio msimamo ambao alipaswa kuendeleza. Kauli hii inajiri wiki kadhaa baada ya familia ya Odinga kukosolewa kwa kuwaalika viongozi wa mirengo tofauti ya kisiasa kwenye hafla ya Oktoba 15 katika uwanja wa Migwena, Bondo, kuadhimisha mwaka mmoja tangu kifo cha Raila. Miongoni mwa walioalikwa alikuwa aliyekuwa Naibu Rais Rigathi Gachagua, ambaye alikuwa mkosoaji mkubwa wa Raila. Ingawa hakuhudhuria, viongozi wengine wa upinzani, akiwemo Kalonzo Musyoka, Edwin Sifuna, Martha Karua na Jimi Wanjigi, walihudhuria. Hatua hiyo iliwakera baadhi ya viongozi wa ODM. Kiongozi wa Wachache katika Bunge la Kitaifa, Junet Mohamed, alisema alikosa hafla hiyo baada ya kuona jina la Bw Gachagua kwenye orodha ya wageni. Mvutano huo ulifichua mgawanyiko ndani ya ODM kati ya wanaounga mkono ushirikiano na serikali ya Dkt Ruto na wanaotaka chama kijitambulishe wazi kama upinzani. Mnamo Oktoba 17, Ida alitetea mwaliko huo, akisema Raila alikuwa na marafiki kutoka pande zote za kisiasa na kwamba kuwaalika hakukumaanisha kuunga mkono misimamo yao. Mchambuzi wa siasa Geoffrey Mboya anasema kauli ya Ida ina uzito kwa sababu sasa ametumia msimamo wa mwisho wa mumewe kueleza msimamo wake mwenyewe. Kwa mujibu wake, mwaliko wa viongozi wa upinzani haupaswi kuchukuliwa kuwa familia ya Odinga imehama kutoka kwa Serikali Jumuishi. Tangu kifo cha Raila, kaka yake Oburu Oginga amekuwa akitetea ushirikiano na Dkt Ruto. Hata hivyo, viongozi kama Sifuna, Gavana wa Siaya James Orengo na Mbunge Babu Owino wamepinga mwelekeo huo, baadhi yao wakijiunga na vuguvugu la Linda Mwananchi. Hata hivyo, wakili Chris Omore anasema kauli ya Ida haimaanishi kuwa ameunga mkono kila hatua ya serikali wala kutangaza kuwa atampigia debe Dkt Ruto katika uchaguzi wa 2027. Anasema ni ithibati tu ya msimamo wake wa kuendelea kuwa katika ODM na kuunga mkono Serikali Jumuishi. Kauli hiyo sasa inampa nguvu zaidi Oburu na washirika wake wanaotaka ODM iendelee kushirikiana na serikali.

read more
T

taifaleo.nation.co.ke

@taifaleo Thu, 12 Nov 2026 06:55:14

Hofu vijana wakiendelea kutekwa nyara na kutokomezwa Pwani

LALAMA za vijana kutekwa nyara katika eneo la Pwani zimezidi kuibuka, huku familia zilizoathirika zikiitaka serikali kueleza waliko wapendwa wao. Suala hilo limefika katika Seneti, ambapo Jumanne, Seneta maalumu, Bi Shakila Abdalla aliwasilisha ombi kwa Kamati ya Usalama wa Taifa, Ulinzi na Mahusiano ya Kigeni, akitaka uchunguzi kuhusu ongezeko la visa vya watu kutoweka katika Kaunti ya Lamu. Kulingana na ombi lake, karibu watu 55 kutoka maeneo ya Kizingitini, Mbwajumwali, Tchundwa, Myabogi, Pate na Siyu waliripotiwa kutoweka kati ya Septemba na Oktoba 2026 chini ya mazingira yasiyoeleweka. Maafisa wa usalama kaunti hiyo wanadai uchunguzi wa awali ulionyesha baadhi ya waliotoweka huenda walivuka mpaka na kuingia Somalia, ambako wanashukiwa kujiunga na kundi la wanamgambo wa Al-Shabaab. Hata hivyo, familia zao zinadai wapendwa wao walitekwa na watu wanaoaminika kuwa maafisa wa polisi. "Visa hivi vimezidisha hofu, wasiwasi na hali ya kutokuwa na uhakika katika jamii na vinaonyesha umuhimu wa uchunguzi wa kina, uwajibikaji na taarifa za haraka kwa familia zilizoathirika," alisema Bi Abdalla. Hata hivyo, Kamanda wa Polisi wa Kanda ya Pwani Ali Nuno alikanusha madai ya kuhusika kwa maafisa wa usalama, akisema ni visa viwili pekee, kimoja Lamu na kingine Mombasa, vilivyoripotiwa rasmi. "Hatufahamu visa vingine wanavyovizungumzia. Ikiwa wana taarifa, wajitokeze na kuviripoti," alisema Nuno, kwenye mahojiano na Taifa Leo. Familia kutoka maeneo mbalimbali ya Pwani pia ziliandamana Mombasa Jumanne, zikitaka majibu kuhusu kutoweka kwa jamaa zao. Zilisema baadhi ya wapendwa wao walichukuliwa nyumbani au kutekwa mitaani na watu waliokuwa wakitumia magari yasiyo na nambari za usajili. Bw Athman Said, mkazi wa Lunga Lunga, Kaunti ya Kwale, alisema bado anamtafuta kakake Shaban Bakari, anayedaiwa kutekwa katika barabara ya Limuru, Kaunti ya Nairobi, Oktoba 21. Alisema familia ilipopiga simu ya kakake asubuhi iliyofuata, mtu asiyejulikana aliipokea na kudai alikuwa ameokota simu hiyo, akiahidi kuipeleka katika kituo cha polisi kilicho karibu. Said alisema watu waliomchukua kakake walikuwa katika magari matatu aina ya Subaru. Familia hiyo pia iliwahi kumpoteza mjomba wake, ambaye mwili wake ulipatikana Mida, Kaunti ya Kilifi, baada ya kutoweka Msambweni, Kwale, Februari. Katika kisa kingine, Bw Musa Ahmed alisema kakake Yassin Kapsandui alitekwa Julai 6 na kuachiliwa karibu mwezi mmoja baadaye. Hata hivyo, Agosti, watu wenye silaha wanaoaminika kuwa polisi walivamia nyumba yao Likoni na kumkamata tena. Familia nyingine inamsaka Said Shafi, ambaye Bw Mohamed Said anasema alikamatwa Shika Adabu, Mombasa Agosti 8, kabla ya kufikishwa mahakamani siku nne baadaye. Mahakama ilimwachilia kwa kukosa ushahidi wa kutosha, lakini anadaiwa kutekwa tena siku chache baadaye na watu waliovalia sare za polisi na kufunika nyuso zao. "Aliachiliwa na mahakama, sasa kwa nini akamatwe tena siku chache baadaye? Hadi sasa hatujui aliko," alisema. Shirika la kutetea haki za binadamu la Vocal Africa lilisema limerekodi visa 26 vya watu kutoweka kwa njia tatanishi katika eneo la Pwani tangu Januari. Mkurugenzi wa shirika hilo, Bw Hussein Khalid, alisema shirika hilo liko tayari kusaidia familia kuwasilisha maombi

read more